Breve di papa Sisto V

Allegato al n.139 (cc. 368r-374r)
 
//c. 367r//
 
Sixstus PP. V
 
Dilecti Fili nostri salutem. et apostolicam benedictionem. Quae almae urbis nostre ornatum, ac decorem, habitantiumque in ea commoditatem, et utilitatem augere possunt; ea omni studio, ac voluntate amplectenda, fovendaque a nobis sunt. Cum itaque altior, amoenior, et salubrior ipsius urbis pars, quae in Lateranum, et loca adiacentia vergit, tanta aquae penuria laboret, ut eam ob causam, aedificiis infrequens, et parvo ad modum usui sit possidentibus. Nos hic tanto publico in commodo opportuna aliqua ratione providere cupientes, de rivo aquae, qui ex monte ultra Pantanum Grifi scaturit, in Urbem ad plateam beatae Mariae Angelorum in Termis deducendo magnopere cogitavimus, quam quidem aqua foelicem de nostro nomine appellari volumus. Ac ut hoc negotium recte procedat, et quam celerrime perficiatur, tua in eo opera, industria, autoritate, ac virtute uti decrevimus, certum habentes, te pro tua animi magnitudine, ac propensa erga Populum Romanum voluntate, et in nos sanctamque sedem apostolican devotione, id oneris haud gravate suscepturum. Igitur  motu proprio, et certaque scientia nostra, auctoritate apostolica apostolica tenore presentium, circumspectioni tuae commictimus, ut assumpto tecum dilecto Filio Ioanne Bernardino Piscina Camarae Nostrae Apostolicae Commissario Generali, primum cum dilectis Filiis dominis de Columna, in quorum ditione aqua Grifi nascitur, agas, et de iusto, ac convenienti illius pretio concordes, deinde cum Matteo Bartholami Civitatis Castelli, quatenus pertinet ad aquam ducendam; quam ille curam, ut accepimus, suscipere paratus est, tractes, et paciscaris, ac quicquid expedire iudicaveris, ad bonum operis initium, illusque, progressum statuas, et promittas, stipendiaque seu salaria, tam dicto Mattheo, quam aliis duobus ex Populo Romano operi praeficiendis, aliisque ministris necessariis, ac tibi bene visis, qui ad nutum tuum sint amovibiles, decernas, declares, et assignes, caveasque in primis, ut intra biennium proximum praedicta aqua omnino per eos, quibus negotium datum erit, ad dictam plateam ducatur; caeteraque omnia facias, mandes, et exequaris, quae desuper //c. 367v// necessaria fuerint quomodolibet, et opportuna; super quibus omnibus plenam, et liberam tibi eadem auctoritate damus, et concedimus facultatem, ac potestatem. Decernentes ex nunc, prout ex tunc quaecunque abs te, vel ab alijs praedictiis iusso tuo, huius facultatis vigore, acta, gesta, promissave fuerint, per inde rata, firma, et grata esse et censeri, ac si nos ipsi iussissemus, suique  per quoscunque Judices ordinarios, et delegatos iudicari, et definiri debere, ac irritum, et inane, si quid secus super his a quoquam quavis autoritate scienter, vel ignoranter contigerit attentari. Contrariis non obstantibus quibuscunque. Volumus autem, quod universa pecunia, qua huic operi addicta erit, deponatur super Monte Pietatis de Urbe, unde postea pro rei opportunitate in usus necessarios erogetur.
Datae Romae apud sanctum Petrum sub annulo Piscatoris. Die xxviij Maii M.D.LXXXV Pontificati Nostri Anno Primo. Etc.
Jo Baptista Canobius etc.